630. కీర్తికాంత...

కాలునిలువని సంచారిణియే,

కళాకారులను ఆశల చట్రంలో బంధిస్తూ..!!

631. మౌనభాషనే పరిచయించావు...

మౌనమందాకినిలా మారుస్తూ,

గలగల గోదారిలా సాగిపోయే నన్ను...నా మానసాన్ని..!!

632. నేలపై నడిచే మెరుపులమ్మవే...

నీలిమేఘాల సౌధాన్ని వీడి,

భువిగగనాన తళుకులీనుతూ...వెన్నెలకొమ్మా..!!

633. మంచాలకు నులకలు...

పశువులకు చెలకలు, విత్తనాల మొలకలు,

నీళ్ళుతోడు గిలకలు, పలుకాడు చిలకలు...ఇక చరితలే..!!

634. ప్రొద్దుతిరుగుడు పూల జన్మెంత ధన్యం...

ఆజన్మాంతరం,

ఆదిత్యుని తనివితీరా ఆరాధిస్తూ...మనసుతీరా కాంచుతూ...!!

635. మేఘమాలికలకెవరు తర్ఫీదునిచ్చారో....

క్రమంతప్పక వరుసలో సాగిపోతున్నాయి,

క్రమశిక్షణతో కవాతు నేర్చిన జవానుల్లా..!!

636. వానజాణ అల్లరిదే సుమా...

చినుకుముళ్ళతో సెలయేళ్ళను గిచ్చేస్తూ,

గిరిశిఖరాలను ముద్దాడి...కొంటెగా జారిపోతూ...!!

637. పసితనానికే ఓ అద్భుతం...

రంగులరాట్నమంటే,

జీవితమే...ఒక రంగులరాట్నమౌతుందని తెలియక..!!

638. ఎప్పుడో కలిసినట్లే ఉంది...

కాని ఎన్ని జన్మలని వెనక్కిపోనూ,

నీ జాడను కనుగొనేందుకు..!!

639. ప్రకృతికే సొంతం...కల్పనాచాతుర్యం...

పాలపుంతలతో మిరమిట్లు గొలుపుతూ,

పూల రేకుల పుప్పొడి చినుకు జల్లులను కురిపిస్తూ ..!!

640. ఇటు చివర శబ్దం...అటు చివర నిశ్శబ్దం...

నిలకడలేని భ్రాంతుల నడుమ కొట్టుమిట్టాడుతుంటుంది,

మాయదారి మనస్సు ...!!

641. వయస్సు అనుభవాన్నే పెంచుతుందో...

అనుభవం బ్రతుకునే మార్చేస్తుందో ,

అంతులేని భవసాగరమే..జీవితం..!!

642. గొప్పలయకారుడే ..సృష్టికర్త...

ఒక ప్రక్క పసికందులకు ప్రాణాలను పోస్తూ,

మరొక ప్రక్క వృద్ధులను మృత్యువు ఒడిలోనికి జార్చేస్తూ..!!

643. చినుకు శరాలు...

మేఘాలకోటను కూల్చేస్తున్నాయి,

పిడుగులు ఆయుధాలను ఝళిపిస్తూ..!!

644. సంతోషమైనా, దుఃఖమైనా...

చెలమలూరించే బావులేగా...నయనాలు,

ఆనందబాష్పాలుగానో, అశ్రువులుగానో జారిపోతూ..!!

645. ఊహల ఊయలలే ఊగుతున్నా...

నీ తలపులనే,

జంపాలలుగా చేసుకుని..!!

646. విఫలమౌతున్నా...

కన్నీటిబావిలో నీటినంతా,

జల్లెడతో తోడే ప్రయత్నంలో...!!

647. వేచి చూస్తూనే ఉన్నా...

మది విపంచిని మ్రోగించే,

నీ తీయని స్వరాలకై..!!

648. ఆశల ప్రవాహాలెన్నో...

పొంగిపొరలిపోతున్నాయి,

గుప్పెడంత గుండెలో...ఉప్పెనంత హోరుతో...!!

649. సంతోషంతో గెంతులేస్తోంది...

పసిపిల్లగ మారుతూ...మానసం,

ఆంక్షల అడ్డుగోడలను దాటిపోగానే..!!

650. ఎడబాటు కూడా ఆనందమే...

మన ఏకాంతంలోని జ్ఞాపకాలతో,

నింపుకుంటున్న మానసానికి..!!

651. స్వేచ్చావిహంగాలౌతున్నాయి...

రెక్కలు తొడిగిన అనుభవాలు,

దాచుకున్న మధురానుభూతుల ముడులను విప్పగానే..!!

652. ఆత్మార్పణ చేసుకుంటున్నా...

ప్రేమ శలభాన్నై,

నీ నవ్వుల దీపశిఖల్ని తాకి ..!!

653. దిగంతాలకు వ్యాపిస్తున్నాయి...

దిగులు మబ్బులు,

హృదయాకాశమంతా...ముసురు పట్టగానే..!!

654. భుక్తాయాసం తప్పడం లేదు...

కొసరి కొసరి తినిపిస్తూ,

నీ ప్రేమ విస్తరిని వడ్డిస్తుంటే..!!

655. వేచిఉన్నా...

పచ్చిక పానుపునై,

మనసుతీరా నిను సేదదీర్చాలనే..!!

656. విశ్వరూపం ఆవిష్కరింపబడేదెపుడో...

ప్రేమయనే మహాశక్తిని,

కనులారా దర్శిద్దమంటే..!!

657. ప్రకృతికాంతనవ్వాలనుంది...

వసంతుడవై అరుదెంచే నీకై,

అభిసారికనై వేచిచూస్తూ...!!

658. హృదయం నలుగుతోంది...

మన బంధం,

మనస్సుకు సంకెళ్ళు వేయగానే..!!

659. సమయాన్ని సంధిస్తున్నా...

నీ ఊహలలో బంధీనౌతూ,

నీ ఊసులతో లాహిరిలూగుతూ..!!

660. సుమాన్నై విరియాలనుంది...

నీ తలపుల మొగ్గలనే తొడుగుతూ,

నీ జ్ఞాపకాల పరిమళాన్ని వెదజల్లుతూ..!!

661. తడిచి ముద్దౌతున్నా...

వలపుల వానలలో,

నీ తలపుల చినుకులేవో తడిపేస్తుంటే..!!

662. పడుతూనే ఉన్నా...కన్నీళ్ళను దోసిళ్ళతో...

నీతో గడిపిన క్షణాలను గుప్పిళ్ళలో,

నువ్వు చేసిన బాసలు దాటిపోగానే..!!

663. వడలి రాలిపోతున్నాయి....

విచ్చీ విచ్చని ఆశల మొగ్గలు,

వేదనల ముసురు తాకిన మనోవనం మాగిపోతుంటే..!!

664. మౌనపు సేద్యం చేస్తున్నా...

మనసుక్షేత్రాన...ఊహల విత్తులను నాటుకుంటూ,

వేదనల కలుపులనేరి పారేస్తూ..!!

665. పేదలైపోతున్నాయి అనుబంధాలు...

మనుషులనే కాదు,

మమతలు నిండిన మనసులను కూడా కొనలేనంతగా..!!

666. జీవితమంటే....

మరణాన్ని,

పెంచి పోషించడమే..!!

667. ఎంత గర్వమో...

మెరుపు తీగలకు,

వెలుగుపూలను అలవోకగా రాల్చేస్తూ...!!

668. సవారీలు దేనికో...

కులపు గుర్రంపై దౌడుతీస్తూ,

మానవకులాన్ని విడనాడుతూ..!!

669. నవరసాలను పలికిస్తూ...

నాటి సినీగేయాలు,

వాయిద్యాలు మింగేస్తూ...నేటి పాటల హంగులు..!!

670. వేకువ తలుపులను తెరుస్తోంది పల్లెతల్లి...

తెలిమంచు బిందువులలో తానమాడి,

సూర్యబింబపు సింధూరాన్నినుదుటన దిద్దుకుంటూ...!

671. పలుకుల కంటకాలు...

మస్తిష్కపు పొరలను చీల్చేస్తూ,

గాయాల గేయాలై...హృదయవీణియ తంత్రులను తెంచేస్తూ..!!

672. మన అధీనంలో లేనివే...

ఇటు బాల్యమూ...అటు ముసలితనమూ,

జీవితాలు ముగిసిపోయేవరకు..!!

673. ముత్యాలరాశులై మెరిసే నీ నవ్వులు...

సిరి'మువ్వలై రవళించే నీ పలుకులు,

నా మనస్సు కాంచే...సుందరమైన దృశ్యాలే...!!

674. ఆశలెన్నో పొంగిపూస్తున్నాయి...

కన్నె కలువలై,

మదికోనేట...తలపుల పరిమళాలతో..!!

675. పన్నీటి కల్లాపినే జల్లుకుంటున్నా...

ఊహల పూలజల్లులనే కురిపిస్తూ,

మదివాకిట నీ కలల రంగవల్లులనే దిద్దుకుంటూ..!!

676. హృదయకుసుమం వికసిస్తోంది...

వలపు నెత్తావులతో,

మనోవనమంతా...మరువపు మత్తులను వెదజల్లుతూ..!!

677. దివాకరుడు...

వెలిగిస్తూనే ఉంటాడు,

దేదీప్యమానంగా...రోజుదివ్వెను..!!

678. అచంచలమైనదే...

నీ అనునయసన్నిధి,

వెన్నెల వెలుగుల చల్లదాన్ని నింపుకుంటూ..!!

679. సరిదిద్ది నడిపిస్తూనే ఉంటావు...

నే తప్పటడుగు వేసిన ప్రతిసారీ,

కన్న ప్రేమను తల(మరి)పిస్తూ...!!

680. అంత సులభతరమా...

ఆవిష్కరించగలగడం,

రమణీయమైన ప్రకృతికాంత...అంతరంగాన్ని...!!

681. కాంతిపుంజాన్ని విరజిమ్ముతోంది...

నీ నవ్వుల చిరుదివ్వె,

అలుముకున్న విషాదాన్ని...పటాపంచలుచేస్తూ..!!

682. ఏ బంధనాలు ముడిపడ్డాయో...

నను నీకు కట్టిపడేస్తోంది,

అస్వతంత్రమైన...నీ చెలిమి స్వతంత్రం..!!

683. తప్పొప్పుల పట్టీలెందుకులే...

కోల్పోయిన జీవితాన్ని,

గుర్తుచేసుకుని బాధపడడానికి తప్ప...!!

684. వెంటాడుతోంది...

నీడలాంటి గాయమేదో,

గుండె చెలమలను మరింత తడిచేస్తూ..!!

685. నేల రాలిపోతున్నాయి...

నా స్వప్నసుమాలన్నీ,

కన్నీటి కొలనులో విరిసిన తామరలుగా..!!

686. కాలిపోతూనే ఉంటాయి...

కాలపు కుంపటిలో,

క్షణాల నిప్పులు ...బొగ్గులనుసిగా మిగిలిపోతూ..!!

687. చెరిగిపోతున్నాయి...

కన్నీటి అలలపై,

కరిగిపోతూ...నా కలల రాతలన్నీ..!!

688. నువ్వెళ్ళాకా...

గాయాలై వేధించే జ్ఞాపకాలు కొన్ని,

లేపనాలై మరిపించే స్మృతులు మరికొన్ని...!!

689. నా మనోవనంలో వాలిన కోయిలలెన్నో...

చైత్రరాగాలతో మైత్రీవేణువులూదుతూ కొన్ని,

శిశిరనాదాలతో శీతలరాగమాలపిస్తూ మరికొన్ని ..!!

690. కాలాన్ని ఆపేయ్యాలనుకున్నా...

నీతో(లో) ఉన్న క్షణాలలోనే,

గుండెను చిధ్రం చేసిపోతాయని తెలియక ..!!

691. మనసునే పూల తివాచీగా పరిచాను...

అడుగులెక్కడ కందిపోతాయోనని,

ముళ్ళబాటపై వదిలేసిపోతావని ఊహించలేక..!!

692. నా మదివేదికపై...

ఆనందతాండవంతో నర్తిస్తూనే ఉన్నాయి,

నువ్వు మురిపించిన మువ్వల పలుకులన్నీ..!!

693. ఇష్టంగానే ఆరగిస్తున్నాను...

నీ ప్రేమవిస్తరిని,

కష్టమైనా...నష్టమైనా నీతోనే జీవిద్దామని..!!

694. ఆనందాల ఊయలలూగుతున్నా...

నీ లయలనే,

జంపాలలుగా మార్చుకుంటూ..!!

695. పర్యావరణమంటే...

పరిసరాల మౌలిక విషయాలేనని ఊరుకుంటే ఎలా...

నువ్వు, నేను కూడా వాటిలో భాగమేగా..!!

696. మౌనవిస్తున్నాయి మాటలు...

చూపుల కొసలమీద వేళ్ళాడుతూ,

అను'నయాలతో పరామర్శిస్తూ..!!

697. వయస్సుతో పనేమిటిలే...

మన మనసుల భావాలను గీసుకున్న చిత్రాలకు,

యౌవనవీధిలో విహరిస్తూ...ప్రాయాన్నే మరిపిస్తూ..!!

698. ఎంత అమాయకత్వమో ...

సూత్రానిది,

పూలను బందించాననుకొని...తానే బందీయౌతూ..!!

699. కలమే హలం...

సాహిత్యపు తోటలో,

భావసేద్యం చేసేందుకు...అక్షరసుమాలను పూయించేందుకు..!!

700. ఒళ్ళంతా కళ్ళేనేమో...

దర్పణానికి,

ఏమీ దాచుకోకుండా నిజాయితీగా మొత్తం చూపించేస్తూ..!!

701. కొత్తరాగమాలపిస్తోంది...

ఎద కోయిల,

ఋతువువై నువ్వు పరిమళించగానే..!!

702. చెల్లించక తప్పదేమో...

జీవితాన్నే రుసుముగా,

ప్రేమభారాన్ని హృదయాన మోస్తున్నంతవరకు..!!

703. ఏమిపనిలే...గొర్రెలమందలతో...

చీమలబారుని చూసి నేరిస్తే సరి,

ఐక్యతకున్న విలువ ఏమిటో...!!

704. మనస్సును ఛిద్రం చేస్తూనే ఉంటాయి....

మరుగైనాక కూడా,

మరువనీయని నీ స్మృతులు...!!

705. తెగ హొయలుపోతోంది...

ఏకాంతం,

నా జ్ఞాపకాల్లోకి నువ్వు చేరిపోగానే..!!

706. కోరికల వ్యామోహం తగ్గదెందుకనో...

మనిషి జన్మకి,

మరణం తధ్యమని తెలిసీ..!!

707. ఎంత నిరంకుసత్వమో...

పాషాణమంటి కాలానికి,

నెత్తురోడిన క్షణాలలోకే నిరంతరం నెట్టేస్తూ...!!

708. ఇంత వెఱ్ఱిదేమిటో ప్రేమ...

సంతోషమొచ్చినా...దుఃఖమొచ్చినా,

మనస్సును చీల్చుకుని మరీ బయటపడిపోతూ...!!

709. ఓటమి తప్పడంలేదు...

బేల హృదయానికి,

ప్రేమను పంచాలనుకున్న ప్రతిసారీ...భంగపడిపోతూ...!!

710. ఎంత చిత్రమో...

నీ కలలే మిగులుతున్నాయి,

నా రాత్రులన్నింటినీ జల్లెడపడుతుంటే..!!

711. వేధించే జ్ఞాపకమే నీవు...

మాయని గాయమై,

పదే పదే వేదనల పుండును రేపుతూ..!!

712. అబద్ధమాడుతున్నావు కదూ...

నన్నసలు తలవనని,

మరి కెంపులెందుకు తళుకులీనుతున్నాయో....చెక్కిలిపై..!!

713. ఎప్పుడూ వరదలే...

నయన సంద్రానికి,

కలతల అలలతో ఎగసి ఎగసి పడుతూ...!!

714. ఎదుటా..ఎదలో...

ప్రేమగా తడుముతూ,

తానే...నా ప్రపంచమౌతూ...!!

715. తడిమి చూడు...

పగిలిన హృదయాల్ని,

ఓడిన ప్రేమదే...తాకే కన్నీటి వ్యధంతా...!!

 716. ప్రేమికులకేమి తెలుసు...

ముక్కలైన గుండెలనడిగి చూడు,

తెలుస్తుంది...ప్రేమలోతెంతో..!!

717. చంద్రం మాష్టారు...

బొత్తిగా మొండిఘటం...సుమా,

ఎడాదికోమారైనా సెలవీయరు పాపం...తారల బడికి ..!!

718. మనమేలే...

మిత్రులమైనా...శత్రువులమైనా,

మనసు నేస్తాన్ని ఊరడించేందుకో...గాయపరిచేందుకో..!!

719. వాహ్యాళికి  బయలుదేరింది...

పున్నమి రాణి,

గగనపుతోటలో...వెన్నెలపూలను ఏరుకునేందుకై ...!!

720. సింగారించుకోక తప్పడం లేదు...

మోముపై బూటకపు నవ్వులను,

అనుక్షణం హృదయం నలిగిపోతుంటే ..!!

721. వెదుకుతూనే ఉన్నా నీకై ...

నీ జ్ఞాపకాల నీడలలో,

మరణించని నా ఆశలను మభ్యపెట్టుకుంటూ..!!

722. నమ్మకపు ఖజానాను తెరిచాను...

భావోద్వేగాలను నియంత్రించుకుంటూ,

గెలుపుపై పట్టును సాధించాలనే...!!

723. నిరీక్షణేనా బ్రతుకంతా...

ప్రేమించే హృదయానికో,

ప్రేమించబడే సమయానికో..!!

724. గుండెకింత సవ్వడి దేనికో...

మనస్సుదాటని మౌనాలనేవో,

పెదవులపై ఒలికించుకోవాలని..!!

725. ఊహించనే లేదు...

నా చెక్కిలిపై,

కన్నీటి చుక్కలా నువ్వు జారిపోయే రోజొస్తుందని..!!

726. హృదయతంత్రులను మీటుతుంటాయి...

నీ మాటలే మధురస్వరాలై,

నేనలసిసొలసినపుడల్లా..!!

727. సెలయేటి గలగలలెన్నో...

తన తలపుల స్పర్శలేవో,

సుతారంగా గుండెను తాకగానే..!!

728. కదలలేమని అడుగులు...

వదలలేమని జ్ఞాపకాలు,

మొరాయిస్తున్నాయి..తానొదిలిన క్షణాల్లోనే నిలిపేస్తూ ..!!

729. సంక్షోభంతోనో...

సంఘర్షణలతోనో,

వివర్ణమైపోతోంది...నువ్వొదిలెళ్ళిన ఏకాంతం..!!

730. ముడుచుకుంటోంది...

ముగ్దలా నిశీధి కన్నె,

వెలుగురేఖల ఆలింగనాలతో..!!

731. గొంతెత్తి పాడుతోంది...

హృదయమొక గీతాన్ని,

ఏ బాల్యస్మృతి మీటిందో..!! 

732. బయల్పడుతోంది...

తన రూపమే,

నను నేను ఛిద్రం చేసుకోగానే..!! 

733. ఏ గీతాన్ని ఆలపిస్తుందో...

చీకటి గాయని,

రాత్రి గుండెను కరిగించేందుకై..!!

734. తిక్కెక్కువే...సంద్రపు అలలకు...

తుడిపి పోయాయి అల్లరిగా,

సైకతశాసనంపై నేనపురూపంగా చెక్కుకున్న పేరును..!!

735. గుండె గుహలో ప్రవహిస్తున్నాయి...

చల్లని నదీనదాలెన్నో,

కొన్ని ఆనందక్షణాల్ని దోసిలట్టగానే..!!

736. నదిలా ప్రవహిస్తోంది...

గుండెల్లో అను'రాగ గానమేదో,

తన అనునయాలేవో హృదియలలను మీటుతుంటే..!!

737. రాజుకుంటూనే ఉంటాయి...

పగలంతా వేదనల చితుకులు, 

రాత్రిపూట మంటల్ని ఎగదోసేందుకై..!!

738. చినుకులుగానే రాలిపోతుంటా...

గుండె వాన కన్నుల్లోకి పెల్లుబికినపుడల్లా,

చెక్కిలి క్షేత్రాన్ని ముంపుకు గురిచేస్తూ..!!

739. అంకురిస్తోంది ఓ ఆశాబీజం...

పన్నీటి చేతులతో పొదువుకోగానే,

సంతసాల చివురుటాకులను తొడుక్కుంటూ..!!

740. స్వరాలాపన చేస్తోంది...

ఓ అల్లరి రెమ్మ,

తన చిట్టి ఆకుల్లో కూనలమ్మను దాచుకుంటూ..!!

741. జలజలా జారిపోతున్నాయి...

కనుల బరిణెల నుండి,

మది భాండాగారాన్ని దాటిపోతున్న పన్నీటి ముత్యాలన్నీ..!!

742. అల్లరి పిల్లలే...

చిలిపిగా పాదాలతో ఆటలాడే,

ఆ అందాల సెలయేళ్ళన్నీ..!!

743. ఆదమరిచి నిదురోతోంది...

హాయిగొలుపు  ఒడిలో,

అమ్మలు రూపంలో...నా పసిదనం..!!

744. మత్తిల్లిపోయే సౌరభాలే...

నా మనోవనమంతా,

తను నిండుగా నవ్వగానే..!! 

745. ఆకాశవీధిలో ఆటలేమిటో...

మంచు దుప్పటిని కప్పుకుని నిదురోక,

ఆదివారపు సూర్యుడికి...ఆటవిడుపేమో మరి..!!

746. ఓదార్చడం తేలికే...

మరువడమే కష్టం,

ప్రేమలో మనస్సు చెదిరినా...గెలుపులో ప్రయత్నం ఓడినా...!!

747. పదాలతో పరిచయం పెంచుకుంటున్నా...

భాషపై పట్టును సాధించాలనే,

తప్పదు మరి...కవిత్వం వ్రాసేయాలని శపథం పట్టేసాగా..!!

748. తెలుసుకోవాలనే ఉంది...

తుదిగడియలోపు,

నేనెవరి గుండెల్లో పదిలమై ఉన్నానో..!!

749. గగనపు వెండితెరపై ...

మెరిపించే "తారా"నటులే,

తెరమరుగవని నక్షత్రాలన్నీ..!!

750. ఒంటరిదైపోయింది...

హృదయ పంజరం,

ప్రేమచిలుక ఎగిరిపోగానే..!!

751. తెలుగు అక్షరాలు అవిటివై పోతున్నాయి...

ఆంగ్ల విద్య మోజులో,

వంకరలుపోతున్న...నేటితరం పలుకుల తాకిడితో..!!

752. వృద్ధాప్యం...

కన్నవారు లేని బాల్యం,

కడుపున మోసినవారి ఒడిలో చేరే పసిదనం..!!

753. వెంటతీసుకెళ్ళాలని లేదు...

స్మృతులను సైతం,

నే పయనమై'పోతున్న సాంత్వనపురికి..!!

754. వసంతాలను వెదజల్లుతుంటాయి...

ప్రతి ఋతువులోను పరిమళిస్తూ,

అందమైన నవ్వుల పువ్వులు..!!

755. మోసపోతూనే ఉన్నాను...

నీ లోకంలోనే కాలాన్ని వృధాచేస్తూ,

నాకంటూ ఓ జీవితముందన్న విషయాన్ని మరిచి..!!

756. చేజిక్కించుకోవాలనే ఉంది...

నాదైన జీవితాన్ని,

ఆంక్షలచట్రాన్ని ఛేదించుకుంటూ...!!

757. నిష్క్రమిస్తున్నా...

నీ హృదయపు సౌధంనుండి,

అలంకారమై నిలవడం ఇష్టంలేకనే..!!

758. మనకై మిగిలేవారు కొందరే...

మనతో చేరేవారెందరైనా,

ఈ జీవనమజిలీలో...మనస్సుతో ముచ్చటిస్తూ..!!

759. అన్నవారెవరైతేనేమి...

నోరు మంచిదైతే ఊరుమంచిదౌనని,

ఓర్వలేక గాయపరిచేవారెందరో...నోరుమంచిదైనా..!!

760. కొందరికి వెన్నతో పెట్టిన విద్యనే...

శిఖరాన నిలబడ్డ ప్రతిభనైనా,

ఈర్ష్యాద్వేషాలతో...పాతాళానికి త్రొక్కేయడం..!!

761. జీవితానికున్న ఆవలి ఒడ్డునే మరిచా...

అనుభూతుల నౌకలో పయనించాలనే ఆశతో,

ఈవలి ఒడ్డునే ఒంటరినై మిగిలిపోతూ..!!

762. ఏనాటికైనా...

ఒంటరులై మిగిలిపోక తప్పదు,

జీవితంలో,నటించడం మొదలైతే..!!

763. చెదిరిపోతోంది బాల్యం...

పలకాబలపం పట్టే వయస్సులో,

పలుగూపారలను చేతికిస్తుంటే..!!

764. విద్యాలయాలంటే...

విజ్ఞానపు వేదికలే,

జ్ఞానకాంతులను వెలిగించే దీపికలే..!!

765. జీవితమంతా...

వ్యర్ధమైన పోరాటమో...అర్ధంలేని ఆరాటమో,

నిరంతర సమస్యల సంఘర్షణలతో నలిగిపోతూ..!!

766. చిమ్ముతూనే ఉంటావు...

మధుర స్మృతులనెన్నిటినో,

పరిమళించే పన్నీటి కల్లాపిలుగా..!!

767. లక్ష్యమేదైతేనేమి...

గురిచూసి కూల్చడమేగా..ధ్యేయం,

పెన్ను పట్టిన కవికైనా...గన్ను పట్టిన వేటగాడికైనా..!!

768. ఓ చెదరని జ్ఞాపకం...

అపుడెపుడో చేజారిన బాల్యం,

నాకంటూ సొంతమైన...అందమైన చిరుప్రాయం..!!

769. నా ఎదనే తల్పంగా పరిచాను...

నిదురతో వా(సో)లిపోయే నీ నీలికనులకు,

లాలించి జోలపాడి...ప్రేమతో ముద్దాడేందుకై..!!

770. నిశినై ఎదురుచూస్తున్నా...

వెన్నెల జల్లులను కురిపిస్తావనే,

ప్రతి పున్నమిరేయిలో...జాబిలివై..!!

771. ఎవరు జార్చుంటారో...

ధగ ధగలాడే ధవళవస్త్రంలా,

ఆ కొండలపైనుండి జారే జలపాతాన్ని...ఇంతందంగా..!!

772. తళుక్కున మెరిసింది...

కనుకొనల్లో జారుతూ,

ఓ పన్నీటి నక్షత్రం...నవ్వుల కాంతులతో..!!

773. స్పృశించి పోయింది...

ఓ హేమంతస్పర్శ,

అచ్చం తన తీయని స్మతిలాగానే..!!

774. చిక్కుకుంటున్నా ...

ఒక శూన్యపు వలయంలోకి,

నను విడిచి నువ్వెళ్ళిపోగానే..!!  

775. అసహనంగా కదులుతోంది...

చీకటి దుప్పట్లో,

నా రాత్రికీ…నిదుర కరువైపోగానే..!!

776. అనురాగాన్ని మరువలేకనో...

బంధాన్ని విడనాడలేకనో,

ముగించలేకపోతున్నా...జీవిత కావ్యాన్ని...!!

777. వీడ్కోలు పలుకుతున్నాయి...

భారమైన కన్నీళ్ళు ,

చేజారిన చెలిమిగీతాన్ని ఆలపిస్తూ..!!

778. గతం జారిపోతూనే ఉంటుంది...

కాలపు చెక్కిలిపై,

నిస్సహాయంగానో, నిర్వేదంగానో...క్షణాలబొట్లను రాలుస్తూ..!!

779. జ్ఞాపకాలమూటను విప్పుకుంటున్నా...

తలపొకటి తాకగానే,

అనురాగ స్వరాలను మీటుకుంటూ..!!

780. నిరీక్షిస్తూనే ఉన్నా...

నువ్వు కరుణిస్తావనే ఆశతో,

చిన్ని ధ్యాసేదో మదిని తాకగానే..!!

781. కంటిచూరులనుండి జారుతోంది...

మదిని వీడలేని వేదనొకటి...కన్నీటి బొట్టుగా,

అకారణంగా నువ్వు వెలివేసిపోగానే..!!

782. దిగంతాలకు వ్యాపిస్తూనే ఉంటాయి...

మదిగగనంలోని దిగులు మబ్బులు,

కన్నీటి వడగండ్లను కురిపిస్తూ...!!

783. నీ నీలికన్నుల సొగసులు కానరావేమిటో...

సముద్రపు నీరును పట్టిచూసినా,

గగనపు వర్ణాన్ని ఎంతగా తడిమితడిమి చూసినా..!!

784. మదిగగనానికి వలవేస్తున్నా...

నీ జ్ఞాపకాల తారకల్ని పట్టుకుందామనే,

వెన్నెల మురిపాలను పంచుకుందామనే..!!

785. కధ-స్క్రీన్ ప్లే-దర్శకత్వం...

ఆ విధాతనే...అన్నీ,

విధి ఆడే వింత జీవన చిత్రానికి...!!

786. వీడిపోనివి స్మృతులెన్నో...

నా జీవితపయనంలో,

చివరి మజిలీకి చేరిపోతున్నా...!!

787. తలపై మోస్తూనే ఉన్నా...

భారమనిపించే నీ జ్ఞాపకాల బుట్టను,

జీవితపు రహదారుల్లో..తోడులేని ఒంటరినై..!!

788. హృదయమొక శ్వేతపత్రమే...

అనురాగ సంతకానికై వేచిచూస్తూ,

ఆత్మీయతనే ముద్రించుకుంటూ..!!

789. బహిరంగ ప్రేమలేఖను వ్రాస్తున్నా...

స్పందించే హృదయం నీకులేకున్నా,

స్వచ్చమైన ప్రేమకు...రూపముందని నిరూపిద్దామనే..!!

790. మౌనంగానే రోధిస్తున్నా...

నీ మనసుని బాధించడం ఇష్టంలేకనే,

నిన్ను మనస్పూర్తిగా ప్రేమించానుగా..!!

791. మరుపురాని గాయానివే...

అపురూపగేయంలా మలుచుకున్న నువ్వు,

కన్నీటి కావ్యమై జారిపోతూ...!!

792. అనుభూతుల అలలెన్నో...

ప్రేమసాగరంలో విలయతాండవమాడుతూ,

కుదిపేస్తున్నాయి...మదికేంద్రాన్ని తాకుతూ..!!

793. తొలగించేసుకున్నా...

మనస్సును కమ్ముకున్న అపోహలముసుగులన్నింటిని,

నన్ను నేను నమ్మించుకునే పరిస్థితిని అధిగమిస్తూ..!!

794. ఆభిజాత్యాలను వదిలి పెట్టేసాను...

నేను నేనుగా మిగలాలనే,

దేహపు సౌధంలో...స్వాతిముత్యమై మెరుస్తూ..!!

795. క్లేశములోనే ముంచిపోతావు...

ప్రేమనెంతగా పంచుతున్నా,

హృదయాన్ని కానుక చేసాననేగా...అలుసంతా..!!

796. కొత్తపూల నెత్తావులై పరిమళిస్తున్నాయి...

ముకుళించే ఆశల పూలరేకులతో,

జీవితనందనంలో చివురించే...పల్లవాలు..!!

797. ప్రకృతి ఎంత అమాయకురాలో...

ఇవ్వడమే కాని,

తనకంటూ దాచుకోవడం నేర్వనేలేదు పాపం..!!

798. పసినయనాలు భాషిస్తుంటాయి...

ఏ పలుకులూ నేర్వకమునుపే,

నవ్వుల్లోనే అర్ధాలెన్నో దోబూచులాడేలా..!!

799. ఏమి మిగిలిందని...

ఆకాసమంటి అనుభూతిలో,

కనిపిస్తున్నా ...అందనంత దూరాన్నే మిగులుస్తూ...!!

800. ఎన్ని హిమపాతాల్ని కరిగించిందో...

కనుద్వయం,

బాష్పబిందువులుగా జారిపోయే మధురస్వప్నాలకై..!!

801. మొలకెత్తుతూనే ఉంటాయి...

కలల బీజాలెపుడూ,

కన్నీరింకిపోయి...కనులెంతగా బీడువారిపోతున్నా..!!

802. నాగరికమో...

ఆధునికతనో,

ఇరుకైపోయిన మనసులకు పడుతున్న దర్పణంలా..!!

803. రాజుల సొమ్ము రాళ్ళపాలైనా...

ప్రజల సొమ్ము వినువీధుల్ని తాకినా,

వేటుపడేది మాత్రం...సా'మాన్యులకే..!!

804. సూరీడుకి తొందరెక్కువే...

పడమటింటికి పరుగుతీస్తుంటాడు, 

శుభసాయంత్రమంటున్నా...వినకుండా..!!

805. వీడని పరిమళాల సంబరమే సుమాలకు...

సూర్యోదయంతో మొదలైన తొలిమజిలీ,

చంద్రోదయంతో తుదిమజిలీయవుతుందని తెలిసినా..!!

806. ఏ రహస్యాన్ని చేరవేస్తుందో...

నీలవేణి ధరణి చెలికి,

చినుకు పరదాలను అలవోకగా జారుస్తూ..!!

807. వెంటాడుతుందో నైరాశ్యం ...

రాలిపడే ఆశాపూలదో,

జారిపడే కన్నీటి చినుకుదో...తెలియనంతగా..!!

808. పొంగి పూసింది కన్నె కలువ...

నులివెచ్చని కిరణమై తాకినంతనే,

తానే...తెమ్మెరై బుగ్గ నిమిరినంతనే...!! .

809. తుళ్ళిపడుతోంది...

ఓ కన్నె సుమం, 

తుంటరి తుమ్మెద తొలిముద్దుతో...!!

810. కాలాన్ని వెనక్కి త్రిప్పేయాలని ఉంది...

ఇప్పుడే నిన్నిక్కడే చూడాలనే,

చిన్ననాటి ముచ్చట్ల ఒడిలో పవళించాలానే..!!

811. చిట్టి బీజానికెంత వినయమో...

కృతజ్ఞతను తెలుపుకుంటుంది,

తన తొలి రెండు ఆకులను చేతులుగా జోడిస్తూ...!!

812. జీవితమొక ఒంటరి నావయే ...

అనునిత్యం కాలపు ప్రవాహంలోనో,

వేదనల సుడిగుండంలోనో...చిక్కుకుపోతూ..!!

813. నిశీధి ఎంత గడుసరిదో...

కలలనైనా...కలువలనైనా,

తన సన్నిధిలోనే పూయించుకుంటూ...!!

814. భావాక్షర భంగిమలెన్నో...

అపురూపంగా కవనంలో చెక్కబడుతూ,

ఒదిగొదిగిపోతూనే ఉంటాయి...సాహితీ శిల్పంలో...!!

815. పయనిస్తూనే ఉన్నా...

నిను కలవాలని కాదు,

నీలో కలవాలనే...!!

816. అద్భుతం కదూ...

ఆ తేనెపట్టు నిర్మాణమే కాదు,

మధుపం కూర్చే మరందాల మధువులు కూడా..!

817. ఎక్కడ నేర్చాయో...

చిట్టి చీమలు ...వరుస తప్పని క్రమశిక్షణను,

యుద్దంలో ఆరితేరిన గొప్ప సైనికుల్లా ..!!

818. అంకితం చేయాలనే ఉంది ...

అల్లరి వానల్లో తడుస్తూ,

నీకై రాలిపడ్డ అనుభూతుల గుర్తులను..!!

819. ఎక్కడ నేర్చాయో...

వరుసక్రమంలో పయనించడం, 

కవాతును చేసే జవానుల్లా...ఆ మేఘాల గుంపులు...!!

820. బాల్యం తడుముతోంది ...

గుండెలకు హత్తుకున్న జ్ఞాపకాలతో,

ఊరేగిస్తూనే ఉన్నాగా...పసిఊహలను, రెక్కల గుర్రంపై...!!

821. పెదవులపైకి జారుతోంది...

మంకెనపూలై విచ్చుకుంటూ,

కన్నులు కలిసిన ఘడియలో మె(వి)రిసిన అరనవ్వొకటి..!!

822. ప్రేమిస్తూనే ఉంటాను ...

నాలో నువ్వు లేవని తెలిసినా,

ఒంటరితనానికి అలవాటుపడ్డానుగా...!!

823. తరలిపోతున్నా ...

తప్పని మరో బ్రతుకు మజిలీకై,

జ్ఞాపకాల మూటబట్టి...వీడ్కోలు భారాన్ని మోసుకుంటూ...!!

824. అంతర్మధనమే...

బరువెక్కే ఆలోచనలతో సతమతమైపోతూ,

మది మాటున దాగుండిపోయిన మౌనాలకు...!!

825. ఆశల పూలెన్నో సుమిస్తున్నాయి...

మరో వసంతాన్ని ఆహ్వానిస్తూ,

చైత్ర కోయిలవై ...నువ్వు మైత్రి వేణువులూదగనే...!!

826. చూసి రమ్మనేగా చెప్పింది ...

కాల్చేసి వస్తే ఎలా ,

ఎంతైనా వానర వంశమేగా మనది...బుద్ధులొదలవుగా...!!

827. సెలవంటూ సాగిపోయే బాల్యం...

మూడునాళ్ళ ముచ్చటని తెలియని అమాయకత్వం,

పసిపాపలదెపుడూ అరమరికలెరుగని దైవత్వమే..!!

828. అందమైన చిత్రాలెన్నిటినో...

గగనపు కాన్వాస్ పై చిత్రిస్తూ,

సృష్టిలయకారుడు గొప్ప చిత్రకారుడే సుమా...!!

829. ఏ మేఘవీణ మీటిందో...

ఉత్తుంగ తరంగమై నర్తిస్తోంది,

గగనవేదికపై నీలవేణి ...!!

830. అంతమెరుగనిదే...

నా నిరీక్షణ,

తిరిగిరాని క్షణాలను లెక్కించుకుంటూ...!!

831. పత్రాలే చప్పట్లు కొడుతుంటాయి ప్రేక్షకులై...

తరువు నుండి తరువును మీటిపోయే,

పవనుని గాలి సంగీతానికి...!!

832. అలవోకగా కలిసిపోతుంటాయి...

వెలుగునీడలు, శబ్దనిశ్శబ్దాలు, జీవన్మరణాలు,

అనంత కాలగమనంలో...రవంత జీవితాన్ని తాకిపోతూ..!!

833. నెలరాజుకి జలుబు బాధలేదేమో...

సంబరంగా మునకలేస్తూనే ఉంటాడు,

ప్రతి చిన్న కొలనులో...రాత్రివేళ జలకమాడుతూ..!!

834. మౌనపు తలుపులను తడుతూనే ఉంటాయి...

సవ్వడి చేస్తూ పలుకరించే అక్షరమువ్వలు,

విస్మయపరిచే కవనమై మనస్సును తాకుతూ..!!

835. కలలు...

మౌనంగానే కరిగిపోతుంటాయి,

తనని తానే ఆహుతి చేసుకునే కొవ్వొత్తిలా..!!

836. ఊహల విహంగమై ప్రేమపక్షి...

తలపుల కిలకిలరవాలతో తేటపడుతూ,

మౌనంగానే ముడుచుకుంటోంది...మదిగూటిలో..!!

837. మనస్సును సేదదీరుస్తోంది...

చల్లగా స్పృశించే ఓ వెన్నెల కెరటం,

మదితీరాన్ని ఆత్మీయంగా తాకుతూ..!!

838. ఇరుసంధ్యలలో విరబూస్తూ...

అందమైన కుసుమవర్ణాలు,

అణువణువూ స్పృశిస్తాయి...అరణ్యాలను సైతం..!!

839. నదాలను సుతారంగా మీటుతూ...

చినుకు తీవెల రాగాలు,

గలగలస్వరాలే పలికిస్తున్నాయి...అలల లయలతో..!!

840. నాలో నేను వేగుతున్నా...

చీకటి గుహలాంటి మదిలో...

చింతల కొలిమిలోనే సెగను కాచుకుంటూ..!!

841. శ్రోతగానే మిగిలిపోయాను...

కాలపు వేదికపై...నటియించే క్షణాలకి,

ప్రేమకు ప్రత్యక్ష సాక్షికాలేనని నిందిచుకుంటూ..!!

842. చెరిసగంగా వాటాలను వేయడం తప్పడంలేదు...

పెంచుకున్న బంధాన్ని, పంచుకున్న అనుభూతుల్ని,

గతవర్తమానాలతో ముడిపడిపోయిందిగా ప్రేమ..!!

843. చిత్రించుకుంటున్నా...

నీ జ్ఞాపకాలనే కుడ్యచిత్రాలుగా,

సజీవ దృశ్యాలలో...నను నేను లిఖించుకునే ప్రయత్నంలో..!!

844. ప్రకృతికీ తప్పలేదు...

వసంతానికి లొంగిపోవడం,

నేను ప్రేమకు దాసోహమైపోయినట్లుగానే..!!

845. పూర్తిగా ఆక్రమించుకున్నా...

నా మనస్సును నేనే...నా అనుకున్న ఆలోచనలతో,

నువ్వు మదిని శిధిలపరిచి పోయాకా..!!

846. మాటివ్వవూ....

ఆర్తిగా అల్లుకుపోనని,

ఒంటరితనంలోని ...నా(నీ) జ్ఞాపకాలకు..!!

847. ఉత్తుంగ తరంగాన్నే...

ఉవ్వెత్తున పడిలేస్తూ...పుడుతూనో...గిడుతూనో,

పడిలేచే అలల కెరటాల హోరుతో సాగిపోతూ..!!

848. నిరంతర సంగీతాన్నే...

నీవు నా హృదయాంతరాలలో,

ప్రాణవాయువువై శ్వాసిస్తుంటే..!!

849. అలసి సొలసిపోనివే...

నీకై నేను కంటున్న కలల అలలు,

మదితీరాన్ని మృదువుగానే  స్పృశిస్తూ..!!

850. సాగరికకు ఎవరు బహూకరించారో...

బంగారు సైకతరేణువులతో నేతనేసి,

వెండితీగ నగిషీలద్దిన అలల కుచ్చిళ్ళ నీలికోకను..!!

851. కన్నెవాగుకెంత ఉత్సాహమో...

కడలి పిలుపువినగానే...పరుగులు తీస్తుంది,

అమాంతం హత్తుకోవాలనే ఆరాటంతో..పడిలేస్తూ..!!

852. భారమైపోతున్నాయి పసిప్రాయాలు...

పెరిగిపోతున్న అంతరాల పరదాలతో,

తరిగిపోతున్న అప్యాయతాపలకరింపులతో..!!

853. నిరంతర గాయాలే...

నీ ప్రేమగీతాలనే ఆలపిస్తున్న,

నా జీవన గేయంలో..!!

854. వలస పక్షులమే ఈ జీవనపయనంలో...

అనంతంలోకి పరుగులుతీస్తూ,

మృత్యువు ఒడిలోకే చేరిపోతూ..!!

855. గాయాల చిరునామాలెన్నో...

అనుమానపు బాణాలు గుచ్చుతుంటే,

మదిని చిద్రంచేస్తుంటే..!!

856. కల్లోలాలనే సృష్టిస్తున్నాయి...

ఘనీభవించిన కలలన్నీ,

కన్నీరుగా కరిగిపోతూ..!!

857. అంకురించే భావాలెన్నో...

అక్షరబీజాలను నాటుకుంటూ,

ఉద్భవిస్తున్నాయి మది పొరలను చీల్చుకుంటూ...!!

858. నే ముద్దాడిన క్షణాలెన్నో ...

నిరీక్షణలోనే వేసారిపోతూ,

ఏకాంతంలోనూ నీతోనే జతపడిపోతూ...!!

859. వెదుకుతునే ఉన్నా ...

కాగితపు పడవల బాల్యాన్ని,

వానజల్లు పలుకరించినపుడల్లా...!!

860. దిబ్బరొట్టె, తేనెపానకాల కమ్మదనం...

నేటి నాగరిక ఫాస్ట్ ఫుడ్లలో వెదుక్కుంటున్నా,

కసిరినా...అమ్మ కొంగులోనే  తలదాచుకునే పసిపాపల్లే..!!

861. జీవితాన్నే చెల్లిస్తా నజరానాగా ...

తుళ్ళే పసిప్రాయం...మళ్ళీ మొదలైతే,

ఏ కల్మషమంటని పసి(డి)లోకంలోనే దాగుండిపోతూ...!!

862. శిశిరానికి వీడ్కోలు పలుకుతూ...

ఆమనికి స్వాగతాలు పాడుతూ,

ప్రకృతంపిన పెద్ద ముత్తైదువే...తీపిరాగాల కూనలమ్మ...!!

863. తేటిది ఎంత అమాయకత్వమో...

సేకరిస్తూనే ఉంటుంది విరితేనియలను,

నిండుకున్న తేనెపట్టు..దోపిడీదారుల పాలనెరుగక..!!

864. ఎండమావేగా జీవితమంటే...

సాగిపోక తప్పదులే,

మరీచికల నీడల్లోనే పయనిస్తూ..!!

865. గతమై మిగిలిపోయేవి...

అనుభవాలైనా ,

మరువలేనివి మాత్రం...మెలిపెట్టే స్మృతులే..!!

866. ఎన్ని ప్రతిబింబాలో...

పగిలిన అద్దంలో,

ఎన్ని ఛిద్రమైన శకలాలో...విరిగిన హృదయంలో..!!

867. అనుబంధాలను ఒడుకుతున్నా ...

దూదిపింజల్లా మార్చుకుంటూ ,

కలలకలంకారిని అద్దుకుందామనే...!!

868. కన్నీటిని ఆపే ప్రయత్నం చేస్తున్నా ...

కాటుకగీతను దిద్దుకుంటూ,

కనుకొసలలో ఆనకట్టగా తానుంటుందనే..!!

869. దైవానికీ తప్పడం లేదు ...

లంచాలను అందుకోవడం,

పూజలు, ముడుపుల రూపంలో...!!

870. తొడుగుకుంటూనే ఉన్నా...

కలల మొగ్గలను,

విజయసుమాలను పూయించుకోవాలనే..!!

871. సప్తవర్ణపు కుంచె దిద్దుతోంది...

దివి కాన్వాస్ పై చిత్తరువులను ,

భువి తివాచీపై హరివిల్లులౌతూన్న సీతాకోకలకు పోటీగా...!!

872. కోస్తూనే ఉంది...

మనసును మెత్తగా,

మౌనమనే చురకత్తి ..!!

873. బాధ రగిలింది...

నీ గుండెల్లో అయితే,

నా కనులు రుధిరమోడుతున్నాయేమిటో..!!

874. కబురులు మాత్రమే చెపుతావు...

కల్లోకైనా రాకుండా...

కలనైనా నిను మరువనని...నిను వీడపోలేనని..!!

875. గాయమే ...

గేయమౌతోంది,

గేయమే గాయమై...హృదిని ఛిద్రం చేయగానే..!!

876. శిశిరం గాయ(రాలి)పడితే మాత్రం ...

మరో వసంతం ఉందిగా,

చివురుల లేపనాలను పూయడానికి ...!!

877. అంకురిస్తోంది…

మురిపెంగా చిరు మొలక,

గింజ గుండెను చీల్చుకుంటూ...!!

878. మనసెందుకో...

సింధు భైరవినాలపిస్తోంది,

మోహన రాగాన్ని విడిచి...!!

879. అనుమానపు చూపులెన్నో ...

గాయాల పుండుపై,

(వెట)కారాలను జల్లుతూ...!!

​

​